Endastöð

Túrinn er búinn.
Það er svolítið skrýtið, ég mun líklegast ekki fatta það fyrr en eftir nokkrar vikur þegar við ættum að vera að fara aftur út.
Við eigum án efa eftir að lifa lengi á þessu ævintýri, en ég er enn að melta s.l. 18 mánuði sem hafa vægast sagt verið stórkostlegir.
En það sem tekur við er kanski aðeins hversdagslegra en skemmtilegt engu að síður.
Ég mun byrja í Tónlistarskólanum í Reykjavík í næstu viku, svo held ég áfram sem skrifta í Kastljósinu á RÚV og er byrjuð að innrétta ný heimkynni með unnustanum.

Til gamans má geta að við spiluðum á 75 tónleikum, heimsóttum 66 borgir í 32 löndum, gistum á ca. 73 hótelum og guð má vita í hvað mörg flug við fórum.

Ég þakka þeim sem heimsóttu síðuna fyrir lesturinn og vona að þið hafið orðið einhverju nær um ferðalag okkar.

Kv. Valdís Þorkelsdóttir


Wonderbrass og Jez á lokatónleikunum á Spáni

Ein vika eftir

Nú fer að líða að lokum hjá okkur, en það er einunis ein vika eftir af ævintýrinu mikla. Loka-giggið verður á Ola festivalinu á Spáni 15. ágúst.
Síðustu viku höfum við alið manninn í Tyrklandi og Portúgal, en erum nú í vikulangri afslöppun í Almeria á Spáni.

Það er fekar skrýtin tilfinning að þessu fari brátt að ljúka, en mikið á ég eftir að sakna þess að spila á tónleikum af þessu tagi,
svo ég tali nú ekki um að sakna túra-fólksins sem við erum búin að ferðast með síðustu 18 mánuði.
Það verður eflaust mikið skælt við sundlaugarbakkann næstu dagana.